Mark 11

Ukungena Kobukhosi EJerusalema

1Bathi sebesondela eJerusalema bafika eBhethifage leBhethani ngaseNtabeni yama-Oliva. UJesu wathuma abafundi bakhe ababili 2wathi kubo, “Yanini emzini ophambi kwenu, okuzakuthi nxa lingena kuwo lizabona ithole likababhemi elingakaze ligadwe muntu libotshelwe khonapho. Lithukululeni lililethe lapha. 3Nxa libuzwa ngumuntu esithi, ‘Likwenzeleni lokho na?’ mtsheleni lithi, ‘INkosi iyalifuna, izalibuyisa masinyane.’

4Bahamba bafumana ithole likababhemi phandle malungana lomnyango likhulekiwe. Balithukulula, 5abantu ababemi khonapho babuza bathi, “Lenzani, lilithukululelani ithole lelo?” 6Baphendula njengoba uJesu wayebatshelile, abantu basebebayekela bahamba. 7Sebelilethile ithole kuJesu bendlala amajazi abo phezu kwalo uJesu wakhwela kulo.

8Abantu abanengi bendlala amajazi abo endleleni, abanye bendlala amahlamvu abawakhwebula egangeni. 9Labo ababehamba phambili lalabo ababelandela bamemeza besithi, “Hosana! Ubusisiwe lowo ozayo ngebizo leNkosi!”

10Ubusisiwe umbuso ozayo okababa wethu uDavida!” Hosana phezulu kwaphezulu!”

11UJesu wangena eJerusalema waya ethempelini. Wathalaza wakhangela konke, kodwa kwathi ngokuba kwasekuhlwile wehlela eBhethani laBalitshumi lambili.

UJesu Uhlambulula Ithempeli

12Ngelanga elilandelayo bathi besuka eBhethani uJesu wayeselambile. 13Wabona bucwadlana isihlahla somkhiwa sithelile amahlamvu, wasondela ukuyabona ingabe sasilabantwana yini. Wafika wabona kungamahlamvu kuphela ngoba kwakungasiso isikhathi sezithelo zomkhiwa. 14Wasesithi esihlahleni, “Akungabi lamuntu lanini ozaphinda adle izithelo zakho.” Abafundi bakhe bamuzwa esitsho lokho.

15Bathi befika eJerusalema uJesu wangena egcekeni lethempeli wafika wabaxotsha labo ababethenga lababethengisa khona. Wagenqula amatafula abantshintshi bezimali lezihlalo zababethengisa amajuba, 16kaze avumela muntu ukungenisa okuthengiswayo ezindlini zethempeli. 17Wathi esabafundisa wathi, “Kakulotshwanga yini ukuthi: “Indlu yami izabizwa ngokuthi yindlu yokukhuleka okwezizwe zonke’? Kodwa lina seliyenze ubhalu lwabaphangi.”

18Abaphristi abakhulu labafundisi bomthetho bakuzwa lokhu basebeqalisa ukudinga indlela yokumbulala, ngokuba babemesaba ngoba ixuku lonke lalimangaliswa yikufundisa kwakhe.

19Kusihlwa baphuma edolobheni.

Umkhiwa Obunileyo

20Ekuseni babehambahamba basebebona umkhiwa owawubunile kusukela ezimpandeni.

21UPhethro wakhumbula wasesithi kuJesu, “Rabi, khangela! Umkhiwa owawuthukayo usubunile!”

22UJesu waphendula wathi, “Woba lokholo kuNkulunkulu. 23Ngilitshela iqiniso ukuthi nxa omunye esithi entabeni le, ‘Suka, ziphosele olwandle,’ engelakuthandabuza enhliziyweni yakhe, kodwa ekholwa ukuthi lokho akutshoyo kuzakwenzakala, kuzakwenziwa kuye. 24Ngakho ngiyalitshela ukuthi loba kuyini elikucelayo ngomthandazo, kholwani ukuthi selikwamukele, sekuzakuba ngokwenu. 25Njalo uma lisima likhuleka, nxa lilesikhwili komunye, mthetheleleni, ukuze uYihlo ezulwini alithethelele izono zenu. 26Kodwa nxa lingathetheleli, loYihlo osezulwini kazukulithethelela izono zenu.”

Amandla KaJesu Ayathandabuzisa

27Bafika njalo eJerusalema, kwathi uJesu ezihambela emagumeni ethempeli kweza kuye abaphristi abakhulu, labafundisi bomthetho kanye labadala. 28Bambuza bathi, “Konke lokhu ukwenza ngawaphi amandla na? Ngubani owakupha amandla okwenza lokhu?”

29UJesu waphendula wathi, “Ngizalibuza umbuzo owodwa. Lingangiphendula ngizalitshela ukuthi ngizenza ngawaphi amandla lezizinto. 30Ukubhaphathiza kukaJohane – kwakusuka ezulwini kumbe ebantwini? Ngitshelani!”

31Bakuxoxa phakathi kwabo bathi, “Singathi ‘Ezulwini,’ uzasibuza athi, ‘Kungani pho lingamkholwanga?’

32Kodwa singathi, ‘Ebantwini … ’ ” (Babebesaba abantu ngoba bonke babesithi ngeqiniso uJohane wayengumphrofethi.)

33Ngakho basebephendula besithi, “Kasikwazi.” UJesu wathi, “Lami kangisalitsheli ukuthi izinto lezi ngizenza ngawaphi amandla.”